İsmayıllı rayonu 1931-ci ildə yaranmışdır.
Sahəsi - 2074 kv.km
Əhalisi - 78 min
Şəhər - 1
Qəsəbə -
2
Kənd - 100-ə yaxın
Ağbulaq kəndi
– Baş Qafqaz silsiləsinin ətəyindədir. Ərəbşahverdi tayfasının qışlaq
yerinin adı olmuşdur. Kənd XIX əsrin sonlarında həmin tayfaların burda
məskunlaşması nəticəsində yaranıb.
Aşağı Zərnəva kəndi – Girdiman çayı sahilində, İlandağ silsiləsinin ətəyindədir. Kənd ərazisindəki Zərnava bulağının adı ilə adlanmışdır.
Aşıqbayramlı
kəndi – Dəvəbatan çayının sahilindədir. XIX əsrin ortalarında
Şamaxı qəzasında yaşamış, mənşəcə indiki Quba
rayonundakı Hapıt kəndindən çıxmış ailələrin məskunlaşması nəticəsində
yaranmışdır. Aşıq Bayram adlı bir şəxsə mənsub ailələr onun adı ilə
aşıqbayramlı adlanmış, sonra bu ad kəndə verilmişdir.
Bağəli kəndi – XIX əsrdə Lahıcdan çıxmış ailələrin burda məskunlaşması nəticəsində yaranıb. “Əlinin bağı” deməkdir.
Balik kəndi –
Toponim qədim türk dilli abidələrdə qeyd olunmuş “şəhər” mənasında işlənən Balik sözü ilə əlaqəlidir.
Basqal qəsəbəsi
-
Niyaldağ silsiləsinin ətəyindədir. Toponim türk dillərindəki basqı
(mənbə, bulaq) və yal (dağ yalı) sözlərindən olub "yaldakı bulaq”
mənasınıdadır. Adı etnonimlədə bağlayanlar var.
Bilistan
kəndi – Toponim tat dilindəki bil (sucaq yer, bataqlıq, çökəklik) və stan (yer, məkan)
sözlərindən (-i birləşdirici şəkilçidir) ibarət olub, "çökəklik(sucaq)yer” mənasındadır.
Bizlan kəndi – toponim qədim İran dillərindəki viş (ev) və lan (hasar, divar) sözlərinin
birləşməsindən əmələ gəlib, “divarla əhatə olunmuş ev” mənasındadır.
Buynuz kəndi – Buynuz
dağının ətəyində Alazan - Əyriçay çökəkliyindədir. Kənd Buynuz dağının adı ilə
adlandırılmışdır. Dağın adı isə uzaqdan
formasına görə mal buynuzuna oxşaması ilə əlaqədardır.
Burovdal kəndi – Yaşayış məntəqəsi yerli əhali arasında Babadərəsi Pirədərə adlanır. Kənd öz adını eyni dağın adından almışdir.
Çəndahar
kəndi – Yaşayış məntəqəsi yaxınlığındakı olan qayanın adı ilə belə
adlanmışdır. "Çənli qaya, dumanlı qaya” mənasındadır.
Burovdal kəndi – Yaşayış məntəqəsi yerli əhali arasında Babadərəsi Pirədərə adlanır. Kənd öz adını eyni dağın adından almışdir.
Çayqovuşan
kəndi – Baş Qafqaz silsiləsinin ətəyində, Qalacıq çayının (Göyçayın
qolu) sol, Başnov çayının sağ sahilində yerləşir.Kənd həmin çayların qovuşduğu
sahadə (çayqovuşanda) salındığı üçün belə adlandırılmışdır.
Vəng kəndi –
toponim “kilsə, məbəd” mənasındadır. Vaxtilə bu ərazidə yaşayan qədim albanlar
xiristianlığı qəbul etmişlər. Kəndin ərazisində kilsə xarabalıqları var. Ümumiyyətlə,
respublika ərazisində mövcud olan xiristian məbədlərini azərbaycanlılar vəng adlandırırlar.
Qalagah kəndi – kəndin
ərazisində V-VI əsrlərə aid olan və
xarabalıqları yerli əhali içərisində Qız qalası adlandırılan qədim qalanın adı
ilə bağlıdır.
Qalacıq kəndi - kəndin
yaxınlığındakı Qalacıq adlı orta əsrlərə məxsus müdafiə istehkamının adı ilə bağlıdır. Əhali
qalaya “Səngər yeri” də deyir. Toponim “kiçik qala” mənasındadır.
Qalıncaq kəndi – sıx
meşəli ərazidə salındığına görə belə adlandırılmışdır. Toponim “sıx meşəli
ərazi” mənasındadır.
Qaraqaya kəndi – kəndin
yerləşdiyi yamacın yuxarısında Qaraqaya
adlı böyük qaya var. Kəndin adı da həmin qaya ilə əlaqədardır.
Qarakolluq kəndi –
toponim qara (burda “çoxluq” mənasındadır), kol sözlərinin və -luq məkan
çəkilçisinin birləşməsindən ibarət olub, “çoxlu kol kos olan yer, xırda
meşəlik, kolluq yer” deməkdir.
Qoydan kəndi – Kuyidan sözünün təhrif olunmuş fomasıdır. Toponim tat dilindəki (dağlı) sözündən və cəm bildirən-an şəkilçisindən ibarətdir. "Dağlılar” mənasını bildirir.
Qurbanəfəndi kəndi - yaşayış məntəqəsi Qurban Əfəndi adlı ruhani bir şəxsə məxsus ailələrin məskunlaşması nəticəsində yarandığına görə belə adlanmışdır.
Quşencə kəndi – kəndin
adı təhrifə uğramışdır. XIX əsrə aid sənədlərdə Quşçu və Yengicə kimi qeyd
olunan toponimin birinci tərəfi quçu
etnonimindən, ikinci tərəfi isə “yeni” mənasında işlədilən yengicə sözündən
ibarətdir. Deməli, "yeni quşcu kəndi" mənasını bildirir.
Dahar kəndi – tat
dilində dahar “qaya” deməkdir.
Diyallı kəndi –
toponim di (tatca “iki”) və yal komponentlerindən ibarət olub “iki yallı yerde
salınan kənd” mənasındadır. Həqiqətəndə kəndin şimalında iki qoşa zirvə, yal
vardır. Toponim öz adında coğrafi
mövqeyi əks etdirmişdir.
Əyyubbəyli
kəndi – Kəndin ailələri Əyyubbəyli adlı şəxsin rəyyəti olduğuna görə kənd belə
adlanır.
Əhən
kəndi – Əhən tat dilində “dəmir” mənasını bildirir. Kəndin adı onun əhalisinin qədimdən
dəmirçiliklə məşğul olması ilə əlaqədardır.
İvanovka kəndi – çar hökumətinin köçürmə siyasəti nəticəsində 1840 - cı ildə Rusiyanın mərkəzi
quberniyalarından köçüb gəlmələr məskunlaşmışdır. Toponim köçürmə kampaniyasına başçılıq edən rus
polkovnikinin adını daşıyır.
İstisu kəndi –
Qalacıq çayının qollarından biri olan İstisu çayının sahilində yerləşdiyinə
görə belə adlandırılmışdır.
Keyvəndi kəndi - keçmişdə
Dağıstanın cənubundakı Keyvən kəndindən
gəlmiş ailələrin məskunlaşması nəticəsində yaranmışdır. Toponim “Keyvən
kəndi" mənasındadır.
Külüllü
kəndi – bəzi tədqiqtçılara görə, əsl adı Kühüllü olmuşdur. Keçmişdə kühül sözü
“yeraltı yaşayış məntəqəsi” mənasında işlədilirdi. Başqa bir fikrə görə,kəndin
adı kühül bitgisinin adındandır.
Kürdeldarbəyli kəndi – XIX
əsrdə Eldarbəy adlı birisinə mənsub olan və maldarlıqla məşğul olan kürd
ailələrinin məskunlaşması nəticəsində yaranmışdır. Toponim “Eldarbəyliyə mənsub
kürdlər” mənasındadır.
Kürdmaşı kəndi – kəndin
adı qurd (igid) sözündən və Maşı şəxs adından ibarətdir.
Gəndov kəndi – Yaşayış məntəqəsi yaxınlıqdakı kükürdlü suyu olan Gəndov mineral su bulağının adı ilə belə adlandırılmışdır.
Göytəpə kəndi – kənd Göytəpə adlı ərazidə salındığı üçün belə adlandırılmışdı.
Lahıc – rayonda şəhər tipli
qəsəbə. Girdiman çayının sahilində, Lahıc çökəkliyində yerləşir. Məlumatlara
görə lahıclar sasani şahı Xosrov Ənuşirəvanın dövründə (531-579) İranın Lahican
əyalətindən köçüb gəlmişlər.
Talıstan kəndi – Bəzi
tədqiqatçıların fikrinə görə, tala (meşədə açıq sahə) və İran dillərindəki stan
(yer, məkan) sözlərindən ibarət olub, “tala olan yer, tala yeri, talalı sahə” mənasındadır.
Rayon ərazisində eyni adlı çay da var.
Minkə
kəndi – bir fikrə görə, kəndin adının tat dilindəki minkə (orta, mərkəz, aralıq) sözündən
olması güman edilir. Digər fikrə görə isə qədim türkdilli min (minq) tayfasının
adı ilə bağlı olub "minglər”, yaxud ming yeri mənasını verir.
Müşgəmir
kəndi –Toponimi ehtimal şəklində şəxs adı ilə bağlayırlar.
Mollaisaqlıkəndi - Quba rayonunu Haput kəndindən gəlmiş Molla
İsaq adlı birisinə mənsub ailələrin
məskunlaşması nəticəsində və onun adı
ilə adlanmışdır.
Namazgah
kəndi – Toponimin hərfi mənası “namaz qılınan yer” deməkdir.
Pirəbülqasım
kəndi – Toponim pir və Əbülqasım (şəxs adı) sözlərindən ibarət olub, Əbülqasım
piri mənasındadır.
Ruşan
kəndi – Ruşi fars dilində “dağ keçidi” deməkdir, -an isə məkan bildirən şəkilçidir. "Dağ
keçidi yeri, dağ keçidi olan yer” deməkdir.
Soltankənd
– toponim Soltan (şəxs adı) və kənd sözlərindən ibarət olub, "Soltanın kəndi, Soltana
məxsus kənd” mənasındadır.
Sulut kəndi –
toponim eyni adlı çayın adı ilə bağlıdır.
Sumağallı
kəndi – Kəndin yerləşdiyi ərazidə çoxlu sumaq kollarının olması ilə bağlıdır.
Tağlabiyan
kəndi – Tədqiqatçıların fikrincə, toponim özündə tağla (Azərbaycanın qədim təklə
tayfasının adının tələffüzdə təhrif edilmiş forması ) və biyan ( bitgi
adlanan) sözlərindən ibarətdir
Tircan kəndi
– bəzi tədqiqatçılara görə toponim
monqol dilindəki tərqən (alaçıq düzəldənlərin başçısı, keçmişdə saraylarda vəzifə) sözünün
təhrif olunmuş formasıdır.
Topçu kəndi
– Azərbaycan dilinin dialektlərində işlənən top (meşə) və içi (içərisi, daxili) komponentlərindən
yaranıb, "meşənin içərisində salınmış kənd” mənasını verir .Kənd həqiqətəndə meşə
içərisindəki talada salınmışdır.
Uştalqışlaq
kəndi – Uştal (kənd adı) və qışlaq komponentlərindən ibarət olub, "Uştal kəndinin
qışlağı, uştallılara məxsus qışlaq” mənasındadır.
Xanagah
kəndi – kəndin adi əvvəl orda mövcud olmuş ibadətgahın adı ilə əlaqədardır. Xanagah
(ziyarətgah, pir və müqəddəs qəbir ətrafında tikililər, zəvvarlara məxsus tikili
qrupu) sözündəndir.
Xankəndi
kəndi – toponim xan və kənd sözlərindən ibarət olub, "xana məxsus kənd” mənasındadır. Mustafa
xana məxsus ailələrin məskunlaşması nəicəsində yaranmışdır.
Hapıtlı
kəndi – Mənşəcə Hapıt Kəndindən (Quba rayonu) köçmüş ailələrin məskunlaşması nəticəsində
yaranmış məntəqələrdəndir.
Hacıhətəmli kəndi – XIX əsrin əvvəllərində Hapıt kəndindən
çıxmış ailələrin məskunlaşması nəticəsində yaranmışdır. Hacı Hətəm bu məntəqənin
əsasını qoymuş haputluların başçısının adı olmuşdur, onun adı ilə adlanmışdır.
Həftəsov
kəndi - Əsl adı Həftəsiyabdır. Toponim tat dilindəki həft (yeddi), -ə (birləşdirici
sait), sov (əslində siyab, yəni "qara su”) komponentlərdən ibarətdir. "Yeddi qara su
mənbəyi, bulağı” mənasındadır.
Zeyvə
kəndi - Zeyvə ərəb dilindəki zaviyə sözu ilə eyni köklüdür və “hücrə", "ibadətgah" , "guşə” mənalarında
işlədilir.
Zərnava
kəndi – Kənd ərazisindəki Zərnova
mineral bulağının adı ilə adlanmışdır.
Zoğallıq
kəndi – Kənd zoğallıq (zoğal ağacları bol olan sahə) ərazidə salındığı üçün belə
adlandırılmışdır.
BABADAGA BAXAN ELLER KITABINDA DAHA ETRAFLI MELUMAT VERILIB BU HAQDA
ReplyDelete